നെയ് ചോറ്

നെയ്‌ച്ചോറിനു പ്രേത്യേകിച്ചൊരു ആമുഖത്തിന്റെ ആവശ്യമുണ്ടോ? നല്ല നാടൻ രീതിയിൽ കറി വച്ച ചിക്കനും ബീഫുമൊക്കെയാണിതിന് പെർഫെക്റ്റ് കോമ്പിനേഷനുകൾ . വീട്ടിൽ നമുക്കിതെളുപ്പത്തിൽ ഉണ്ടാക്കിയെടുക്കാം . അതിനായി രണ്ടു രീതികൾ ഇവിടെ പറയുന്നുണ്ട് ഒന്ന് കുക്കറിൽ ഉണ്ടാക്കാനും മറ്റൊന്ന് വെള്ളം വറ്റിച്ചെടുക്കുന്ന രീതിയും . ഏതു വേണമെങ്കിലും പരീക്ഷിക്കാം.

ആവശ്യമുള്ള സാധനങ്ങൾ :

ജീരകശാല അരി - 1 ഗ്ലാസ്

തിളച്ച വെള്ളം - 2 ഗ്ലാസ് ( അരിയെടുത്ത അതെ ഗ്ലാസിൽ തന്നെ വെള്ളവും അളന്നെടുക്കുക )

നെയ്യ് - 2 1/ 2 ടേബിൾസ്പൂൺ

സബോള 1 1/ 2 എണ്ണം - 1/ 2 കഷ്ണം വഴറ്റാൻ , ഒരെണ്ണം വറുക്കാൻ

ഉപ്പ് - ആവശ്യത്തിന്

ഇഞ്ചി - ചെറിയ കഷ്ണം ചതച്ചത്

അണ്ടിപ്പരിപ്പ് - 12 എണ്ണം

മുന്തിരി - ഒരു പിടി

പെരും ജീരകം - 1/ 2 ടീസ്പൂൺ

മല്ലിയില , പുതിനയില ഓരോ പിടി വീതം

സ്‌പൈസസ് :

കറുകപ്പട്ട - 2 ചെറിയ കഷ്ണം

ഏലക്കായ - 3 എണ്ണം

കരയാമ്പൂ - 3 എണ്ണം

ഉണ്ടാക്കുന്ന വിധം :

1 . ഒരു ഗ്ലാസ് ജീരകശാല അരി 1/ 2 മണിക്കൂർ വെള്ളത്തിൽ കുതിർത്ത്‌ ഊറ്റി വയ്ക്കുക

2 . 2 ഗ്ലാസ് വെള്ളം ഒരു പാത്രത്തിൽ തിളപ്പിക്കാൻ വയ്ക്കുക

3 . അടുത്തതായി ഒരു കുക്കറിൽ 2 1/ 2 ടേബിൾസ്പൂൺ നെയ്യൊഴിച്ച് ചൂടാകുമ്പോൾ പട്ട ഏലക്കായ, കരയാമ്പൂ , പെരും ജീരകം എന്നിവ ചൂടാക്കുക .അതിനു ശേഷം ഒരു ചെറിയ കഷ്ണം ഇഞ്ചി ചതച്ചതും പകുതി സബോളയും ചേർത്ത് വഴറ്റുക. (സബോള ട്രാന്സ്പരെന്റ് ആവുകയേ വേണ്ടൂ . കൂടുതൽ നിറം മാറിയാൽ നെയ്‌ച്ചോറിന്റെ നിറവും ഇരുണ്ടതാകും )*.

4 . ഇനി ഇതിലേക്ക് കുതിർത്ത്‌ ഊറ്റി വച്ചിരിക്കുന്ന അരി ചേർത്ത് നെയ്യിൽ 2 മിനിറ്റ് വറുത്തെടുക്കുക ( ഇങ്ങനെ ചെയ്യുന്നത് ചോറ് തമ്മിൽ ഒട്ടാതിരിക്കാൻ സഹായിക്കും ).എന്നിട്ട് തിളയ്ക്കുന്ന 2 ഗ്ലാസ് വെള്ളം പാകത്തിന് ഉപ്പ് ചേർത്ത് അരിയിലേക്ക് ചേർത്തിളക്കുക . വെള്ളം അരിയിലേക്ക് ചേർത്ത് തിള വരുമ്പോൾ കുക്കർ മൂടി വെയ്റ്റ് ഇട്ട് ഹൈ ഫ്ളൈമിൽ 3 വിസിൽ കൊടുത്തതിനു ശേഷം ഇറക്കി വയ്ക്കുക . പ്രെഷർ മുഴുവൻ പോയതിനു ശേഷം തുറന്ന് ഒരു പരന്ന പാത്രത്തിലേക്ക് മാറ്റി ഒരു ഫോർക് കൊണ്ട് ചോറ് വിടര്തിയിടുക .

5 . അണ്ടി പരിപ്പ് , മുന്തിരി, ഒരു സബോള നീളത്തിൽ അരിഞ്ഞത് എന്നിവ വറുത്തെടുത്തതും , മല്ലിയിലയും പുതിനയിലയും മുകളിട്ട് വിളമ്പാവുന്നതാണ് .

ഇനി വറ്റിച്ചെടുത്തു നെയ് ചോറ് വയ്ക്കാനാണെങ്കിൽ

അരി ആദ്യം 1/ 2 മണിക്കൂർ വെള്ളത്തിൽ കുതിർത്തു ഊറ്റി വയ്ക്കുക. പാത്രത്തിൽ നെയ്യൊഴിച്ച് പട്ട ,ഏലക്കായ , കരയാമ്പൂ , പെരും ജീരകം എന്നിവ ചൂടാക്കുക , ചൂടായി വന്നതിന് ശേഷം ഒരു ചെറിയ കഷ്ണം ഇഞ്ചി ചതച്ചതും സബോളയും ചേർത്ത് വഴറ്റുക . ഇനി ഇതിലേക്ക് ഒരു ഗ്ലാസ് അരി ചേർത്ത് 2 മിനിറ്റ് നെയ്യിൽ വറുത്തെടുക്കുക, എന്നിട്ട് 2 ഗ്ലാസ് തിളച്ച വെള്ളം ഉപ്പു ചേർത്ത് അരിയിലേക്ക് ചേർത്തുകൊടുക്കുക . തിള വരുമ്പോൾ പാത്രത്തിനു മുകളിൽ ഒരു കട്ടിയുള്ള തുണിയിട്ട് ഒരു അടപ്പു കൊണ്ട് മൂടി ചെറുതീയിൽ * 10 മുതൽ 15 മിനിറ്റ് വരെ വേവിക്കുക . ഓരോ 5 മിനിറ്റ് കഴിയുമ്പോളും മൂടി തുറന്ന് ഇളക്കി കൊടുക്കുക .അടിക്ക് പിടിക്കാതിരിക്കാനാണ് ഇങ്ങനെ ചെയ്യുന്നത് ( ഒരു ഗ്ലാസ് അരിക്ക് ഇരട്ടി വെള്ളം ചെക്കുമ്പോളാണ് എനിക്ക് പെർഫെക്റ്റ് ആയി കിട്ടാറുള്ളത് ). ചോറ് നന്നായി പാകത്തിന് വെന്തു എന്നുറപ്പായത്തിനു ശേഷം ഒരു പരന്ന പാത്രത്തിലേക്ക് മാറ്റി ഫോർക് കൊണ്ട് ചോറ് വിടര്തിയിടുക .ഇനി മുകളിൽ അണ്ടിപരിപ്പ് , മുന്തിരി, സബോള എന്നിവ വറുത്തതും മല്ലിയിലയും ,പുതിനയിലയും മുകളിലിട്ടു വിളമ്പാവുന്നതാണ് .

note : അരി വൃത്തിയായി കഴുകിയതിനു ശേഷം മാത്രം കുതിർക്കാൻ വയ്ക്കുക.