നാടൻ ചെമ്മീൻ വട

ചെമ്മീൻ വട ഒരു നാടൻ വിഭവമാണ് . സ്നേക്കായിട്ടോ, ഊണിന് ഒരു സൈഡ് ഡിഷായുമൊക്കെ ഉപയോഗിക്കാം . കഴിക്കാൻ ഏറെ സ്വാദുള്ളതും ഉണ്ടാക്കാൻ ഒട്ടും പ്രയാസമില്ലാത്തതുമായ ഒന്നാണിത് . തീർച്ചയായും പരീക്ഷിച്ചു നോക്കൂ .

ചേരുവകൾ :

ചെമ്മീൻ - 500 ഗ്രാം

ചുവന്നുള്ളി - 12 എണ്ണം ചതച്ചത്

ഇഞ്ചി - ചെറിയ കഷ്ണം ചതച്ചത്

വെളുത്തുള്ളി - 5 - 6 അല്ലി നാടൻ

പച്ചമുളക് - 4 എണ്ണം എരിവുള്ളത്

ചതച്ചമുളക് - ഒരു ടീസ്പൂൺ

പെരുംജീരകം - 1/ 4 ടീസ്പൂൺ ( മുഴുവനോടെ )

മഞ്ഞൾപൊടി - 1/ 4 ടീസ്പൂൺ

അരിപ്പൊടി - ഒരു ടേബിൾസ്പൂൺ ( കുമിച്ചെടുക്കണ്ട )

ഉപ്പ് - ആവശ്യത്തിന്

വേപ്പില - ഒരു തണ്ട്

വെളിച്ചെണ്ണ - വറുക്കാൻ ആവശ്യത്തിന്

തയ്യാറാക്കുന്ന വിധം :

1 . ആദ്യം ചുവന്നുള്ളി , ഇഞ്ചി , വെളുത്തുള്ളി , പച്ചമുളക് , വേപ്പില , ചതച്ചമുളക് , പെരുംജീരകം , മഞ്ഞൾപൊടി , ഉപ്പ് എന്നിവ മിക്സിയുടെ ചെറിയ ജാറിലിട്ട് ചതച്ചെടുക്കുക .

2 . ഇതിലേക്ക് വൃത്തിയാക്കി വച്ച ചെമ്മീൻ ചെറിയ ലോട്ടുകളാക്കി ചേർത്ത് ഒന്ന് ചതച്ചെടുക്കുക . ഇത് മിക്സിയിൽ നിന്ന് മാറ്റിയ ശേഷം ബാക്കിയുള്ളതും ഇങ്ങനെ ചതച്ചെടുക്കുക ( ചെമ്മീൻ മുഴുവനായി അരഞ്ഞു പോകരുത് ).

3 . ഈ മിക്സ് ഒരു ബൗളിലേക്ക് മാറ്റി ഒരു ടേബിൾസ്പൂൺ അരിപ്പൊടിയും ചേർത്ത് കൈ കൊണ്ട് നന്നായി കുഴച്ച് യോജിപ്പിക്കുക . എരിവും ഉപ്പും കൂടുതൽ വേണമെങ്കിൽ അല്പം കുരുമുളക്പൊടിയും ഉപ്പും ചേർത്ത് കൊടുക്കാം .

4 . ഒരു 30 മിനിറ്റ് ഫ്രിഡ്ജിൽ മാരിനേറ്റ് ചെയ്തതിനു ശേഷം വെളിച്ചെണ്ണയിൽ വറുത്ത്‌ കോരുക .