കുടംപുളിയിട്ട നാടൻ അയല കറി ( Macherel Curry )

അയല ഏറെ ഗുണങ്ങളുള്ളതും സ്വാദുള്ളതുമായ ഒരു മത്സ്യമാണ് . കുടംപുളിയിട്ട് മൺചട്ടിയിൽ നല്ല നാടൻ രീതിയിൽ എരിവോടെ ഉണ്ടാക്കിയാൽ ചോറിന് ഇതിനേക്കാൾ നല്ല കോമ്പിനേഷനില്ല .ഹൃദയ സംബദ്ധമായ രോഗങ്ങൾ ഉള്ളവർക്ക് പോലും അയല വളരെ നല്ലതാണ്. ഒമേഗ - 3 ഫാറ്റി അസിഡ്സിന്റെയും വിറ്റാമിൻ D , E മുതലായവയുടെയും പ്രോട്ടീന്റെയുമെല്ലാം ഉറവിടവുമാണ് അയല . അതുകൊണ്ടൊക്കെ തന്നെ അത്ര നിസ്സാരക്കാരനാണെന്ന് കരുതണ്ട.

ആവശ്യമുള്ള സാധനങ്ങൾ :

അയല - 1 kg

ഉലുവ - 1/ 4 ടീസ്പൂൺ

വെളിച്ചെണ്ണ - 3 ടേബിൾസ്പൂൺ

ചുവന്നുള്ളി - 15 എണ്ണം

വെളുത്തുള്ളി - 4 അല്ലി ( നീളത്തിൽ അരിഞ്ഞത് )

ഇഞ്ചി - ഒരു മീഡിയം സൈസ് ( ചതിച്ചെടുത്തത് )

പച്ചമുളക് - 5 എണ്ണം

വേപ്പില - 2 തണ്ട്

മഞ്ഞൾ പൊടി - 1/ 2 ടീസ്പൂൺ

മുളക് പൊടി - 3 1/ 2 ടീസ്പൂൺ

മല്ലിപ്പൊടി - 1 ടീസ്പൂൺ

പെരും ജീരകപ്പൊടി - 1/ 2 ടീസ്പൂൺ

വെള്ളം - 3/ 4 ഗ്ലാസ്

കുടംപുളി - 4 പീസ് ( പുളി നോക്കി ചേർക്കുക )

നാളികേരപ്പാൽ -

ഒന്നാം പാൽ - 1 1/ 4 കപ്പ്

രണ്ടാം പാൽ - 1 1/ 4 കപ്പ്

ഉപ്പ് - ആവശ്യത്തിന്

ഉണ്ടാക്കുന്ന വിധം :

1 . ഒരു മൺചട്ടിയിൽ വെളിച്ചെണ്ണ ഒഴിച്ച് ചൂടാക്കുക .ഇതിലേക്ക് 1/ 4 ടീസ്പൂൺ ഉലുവ ചേർത്ത് കൊടുക്കുക . ചൂടായി വരുമ്പോൾ ചതച്ചു വച്ചിരിക്കുന്ന ചുവന്നുള്ളി , ഇഞ്ചി , അരിഞ്ഞു വച്ച വെളുത്തുള്ളി , പച്ചമുളക് , വേപ്പില എന്നിവ ചേർത്ത് നന്നായി വഴറ്റുക.

2 . വഴന്നു വരുമ്പോൾ മഞ്ഞൾ പൊടി , മുളക് പൊടി , മല്ലിപ്പൊടി , ഉപ്പ് എന്നിവ ചേർത്ത് എണ്ണയിൽ ചൂടാക്കി നിറം മാറുന്നതിന് മുൻപ് 3/ 4 ഗ്ലാസ് വെള്ളം ചേർക്കുക( പൊടികൾ കരിയാതെ ശ്രദ്ധിക്കണം . പൊടിയുടെ നിറം മാറിയാൽ കറിയുടെ നിറവും ഇരുണ്ടതാകും ) .ഇനി ഇതിലേക്ക് 4 പീസ് കുടംപുളി ചേർത്ത് തിളപ്പിക്കുക .

3 . അടുത്തതായി വൃത്തിയായി കഴുകി നുറുക്കി വച്ചിരിക്കുന്ന അയല മീൻ കഷ്ണങ്ങൾ ചേർക്കുക . നന്നായി തിളക്കാൻ അനുവദിക്കുക .5 മിനുട്ടിനു ശേഷം അടിച്ചു വച്ചിരിക്കുന്ന 1 1/ 4 ഗ്ലാസ് രണ്ടാം പാൽ ചേർക്കുക . ഇത് തിളച്ച് വറ്റി വന്നതിന് ശേഷം പെരും ജീരകപ്പൊടി ചേർത്തു കൊടുക്കുക .

4 .ഇനി ഒന്നാം പാൽ ചേർത്ത് കൊടുക്കാം . എല്ലാം കൂടി തിളച്ച് വറ്റി എണ്ണ തെളിയുന്ന പരുവമായാൽ .മീൻ കറി തയ്യാറായി എന്നാണർത്ഥം .