ആവോലി വാഴയിലയിൽ പൊള്ളിച്ചത്

മീൻ വാഴയിൽ പൊള്ളിച്ചത് എന്ന് കേൾക്കുമ്പോൾ തന്നെ വായിൽ വെള്ളമൂറുന്നുണ്ടോ ? ഇത് കഴിക്കാൻ റെസ്റ്റോറന്റിൽ പോകണമെന്നൊന്നുമില്ലാട്ടോ . വീട്ടിൽ തന്നെ നമുക്ക് എളുപ്പത്തിൽ ഉണ്ടാക്കിയെടുക്കാം . വാഴയില പൊള്ളിച്ചെടുത്തതിന്റെ മണവും കുടം പുളി യുടെ രുചിയുമെല്ലമാണ് ഇതിന്റെ ഹൈലൈറ്സ് . ആവോലി വച്ച് മാത്രമല്ല ഇത്തിരി ദശയുള്ള ഏതു മീൻ വച്ചും ഇത് തയ്യാറാക്കാം .അയല വച്ചും എന്തിന് ചാള വച്ച് പോലും വേണമെങ്കിൽ മീൻ പൊള്ളിച്ചത് തയ്യാറാക്കാം. വീട്ടിൽ തന്നെ ഒന്ന് ട്രൈ ചെയ്ത് നോക്കൂ .

ആവോലി മസാല പുരട്ടി വറുക്കാൻ ആവശ്യമുള്ള സാധനങ്ങൾ :

ആവോലി - 500 ഗ്രാം

കാശ്മീരി മുളക് പൊടി - 3 / 4 ടേബിൾസ്പൂൺ

കുരുമുളക് പൊടി - ഒരു ടീസ്പൂൺ

മഞ്ഞൾ പൊടി - 1 / 2 ടീസ്പൂൺ

പെരുംജീരകപ്പൊടി - 3/ 4 ടീസ്പൂൺ

നാരങ്ങാ നീര് - ഒരു നാരങ്ങായുടേത്

ഉപ്പ് - ആവശ്യത്തിന്

വെളിച്ചെണ്ണ - ആവശ്യമുള്ളത്

(മീൻ മസാല പുരട്ടി ഫ്രിഡ്ജിൽ കുറഞ്ഞത് 4 - 5 മണിക്കൂർ മാരിനേഷന് വയ്ക്കണം )

മസാല ഉണ്ടാക്കാൻ ആവശ്യമുള്ളത് :

സബോള - 4 എണ്ണം നീളത്തിൽ അരിഞ്ഞത്

ചെറുള്ളി - 250 ഗ്രാം നീളത്തിൽ അരിഞ്ഞത്

ഇഞ്ചി - ഒരു ഇടത്തരം കഷ്ണം ചതച്ചത്

വെളുത്തുള്ളി - 8 കഷ്ണം ചതച്ചത്

പച്ചമുളക് കീറിയത് - 4 എണ്ണം

വേപ്പില - ഒരു തണ്ട്

മല്ലിപ്പൊടി - 1 1/ 2 ടീസ്പൂൺ

മുളക് പൊടി - 2 1/ 2 ടീസ്പൂൺ

മഞ്ഞൾ പൊടി - 1/ 2 ടീസ്പൂൺ

കുരുമുളക് പൊടി - 3 / 4 ടീസ്പൂൺ

തക്കാളി - രണ്ട് ചെറുത് ( വലുതാണെങ്കിൽ 1 1/ 2 എണ്ണം )

കുടം പുളി - രണ്ട് കഷ്ണം കുതിർത്ത വെള്ളത്തോടൊപ്പം ചേർക്കുക

ഉപ്പ് - ആവശ്യത്തിന്

വെളിച്ചെണ്ണ - ആവശ്യമുള്ളത്

പൊള്ളിച്ചെടുക്കാൻ ആവശ്യമുള്ളത് :

വാഴയില - ഒരു വലിയ കഷ്ണം

വാഴ നാര്

വെളിച്ചെണ്ണ - 3 - 4 റ്റേബിൾസ്പൂൺ

വേപ്പില - ഒരു തണ്ട്

ഉണ്ടാക്കുന്ന വിധം :

1 . 500 ഗ്രാം ആവോലി വൃത്തിയായി കഴുകി മസാല പുരട്ടാനായി കത്തി കൊണ്ട് വരഞ്ഞെടുത്ത്‌ മസാല പുരട്ടി ഫ്രിഡ്ജിൽ 5 മണിക്കൂർ മാരിനേറ്റ് ചെയ്യാൻ വയ്ക്കുക .

2 . രണ്ട് കഷ്ണം കുടംപുളി 1 / 4 കപ്പ് വെള്ളത്തിൽ കുതിരാൻ വയ്ക്കുക .

3 . 5 മണിക്കൂറിന് ശേഷം മീൻ ഫ്രിഡ്ജിൽ നിന്നെടുത്ത്‌ തണുപ്പ് വിടാൻ വയ്ക്കണം ( തണുപ്പ് പൂർണ്ണമായും വിട്ടതിന് ശേഷം മാത്രമേ വറുക്കാനെടുക്കാവൂ ).തണുപ്പ് വിട്ട ശേഷം ഒരു പരന്ന നോൺ സ്റ്റിക് പാത്രത്തിൽ ആവശ്യത്തിന് വെളിച്ചെണ്ണ ഒഴിച്ച് കുറച്ച് വേപ്പില വിതറി മീൻ ഇരുപുറവും നന്നായി വറുത്തെടുക്കുക ( വലിയ മീൻ ആയതിനാൽ ഓരോ പുറവും മൊരിഞ്ഞു വരാൻ സമയമെടുക്കും. ക്ഷമയോടെ വറുത്തെടുക്കുക ).

4 . മറ്റൊരു പാത്രത്തിൽ വെളിച്ചെണ്ണ ഒഴിച്ച് ചൂടാക്കി . സബോള അരിഞ്ഞത് , ചെറുള്ളി അരിഞ്ഞത് , ഇഞ്ചിയും വെളുത്തുള്ളിയും ചതച്ചത് , വേപ്പില , പച്ചമുളക് എന്നിവ ചേർത്ത് നന്നായി വഴറ്റിയെടുക്കുക. തുടർന്ന് മസാലപ്പൊടികൾ ചേർക്കാം . മല്ലിപ്പൊടി ,മുളക് പൊടി , മഞ്ഞൾപ്പൊടി, കുരുമുളക് പൊടി ഉപ്പ് എന്നിവ ചേർത്ത് പച്ചമണം മാറും വരെ വെളിച്ചെണ്ണയിൽ മൂപ്പിച്ചെടുക്കുക . ഇനി തക്കാളി ചേർത്ത് നന്നായി വഴറ്റുക . മസാല നന്നായി വഴന്ന് എണ്ണ തെളിയുമ്പോൾ രണ്ട് കഷ്ണം കുടംപുളി കുതിർക്കാൻ വച്ച വെള്ളത്തോട് കൂടി ചേർക്കുക ( മുഴുവൻ വേണമെന്നില്ല 3 -4 ടേബിൾസ്പൂൺ മതിയാകും , പുളി നോക്കി ചേർക്കുക ) . ഇതോടെ മസാല തയ്യാറായി .

5 .ഒരു വലിയ വാഴയിലയുടെ കഷ്ണമെടുത്ത്‌ തീയിൽ വാട്ടി എടുക്കുക . ഇനി തയ്യാറാക്കിയ മസാലയുടെ പകുതി വാഴയിലയുടെ നടു ഭാഗത്ത്‌ പരത്തി മുകളിൽ വറുത്ത ആവോലി വയ്ക്കുക . മീനിന്റെ മുകളിൽ ബാക്കി പകുതി മസാല കൂടി പരത്തുക . ഇനി വാഴയില വാഴനാര് കൊണ്ടോ ചരട് കൊണ്ടോ നന്നായി പൊതിഞ്ഞു കെട്ടുക.

6 . ഒരു പരന്ന പാത്രത്തിൽ അൽപ്പം എണ്ണയൊഴിച്ച് പൊതിഞ്ഞു വച്ചിരിക്കുന്ന മീൻ വച്ച് ഓരോ പുറവും 5 മിനിറ്റ് വച്ച് പൊള്ളിച്ചെടുക്കുക ( കരിഞ്ഞു പോകാതെ ശ്രെദ്ധിക്കണം ) . മൊത്തം 8 - 10 മിനിറ്റ് കഴിഞ്ഞാൽ ആവോലി പൊള്ളിച്ചത് തയ്യാർ . അപ്പത്തിന്റെ കൂടെയോ പത്തിരിക്കൊപ്പമോ? ചോറിനൊപ്പമോ ? നിങ്ങൾക്കിഷ്ടമുള്ള രീതിയിലകത്താക്കാം .